NASAGMUYO dalang kalagot ang gibati ni Keith Thurman sa tubag sa kampo ni Manny Pacquiao sa dihang iya kining gihagit og rematch.

Kon kahinumdoman, si Thurman miangkon sa iyang split decision nga kapildihan sa ilang away ni Pacquiao niadtong Hulyo 20, apan duha ka semana gikan sa away, nausab ang intonada niini.

Sa ambush interview sa TMZ, iyang gipadayag ang iyang tinguha nga rematch tungod kay alang kaniya wa siyay nakita nga kadaugan ni Pacquiao sa ilang away ug angay lang kini nga tablahon.

Apan ang kampo ni Pacquiao, sa ilang tubag, mipabuhagay nga dili na kini makig-rematch ni Thurman sanglit gusto nila ang ikaduhang away batok ni Floyd Mayweather Jr.

Gipasabot ni Thurman nga way manan-aw sa maong away tungod sa ka bati sa ilang unang away ug dakong sukwahi sa ilang kombati ni Pacquiao nga nakahatag og saktong lingaw sa mga tawo.

“At the end to the day, nobody wants to see it the Mayweather vs. Pacquiao rematch. Real fight fans know, it ain’t gonna be more exciting then what Keith Thurman just did against Pacquiao,” pagyagyag ni Thurman.

Kon dili mahinayon ang pagpakig-rematch ni Mayweather, aduna pay pipila ka mga dagkong away ang hatagan og prayoridad ni Pacquiao.

Kini sama sa pagpakigsangka nila ni Danny Garcia og bisan gani si Mikey Garcia. Mahimo usab nga magpaabot siya sa modaog tali sa panagsangka nila ni Errol Spence ug Shawn Porter. (JBM, World Boxing News)