DILI pa moretiro si Manny Pacquiao sa boxing sukwahi sa gikataho sa nagkadaiyang local ug international media outlets sa miaging adlaw, Septiyembre 19, 2021.

Kini maoy gipabuhagay sa top associate sa Filipino boxing icon nga si Sean Gibbons.

Si Gibbons, kinsa presidente sa MP Promotions nga gipanag-iya ni Pacquiao, mitug-an ni Mike Coppinger sa ESPN.com nga sa umaabot nga pipila ka mga semana, pormal nga ianunsyo ni Pacquiao ang kabahin sa sunod niyang away nga sagubangon.

“In the coming weeks, the senator will decide how he’s going to finish his professional boxing career,” matod ni Gibbons.

“After the fight and recently, he’s discussed retiring or maybe one more fight. He’s just talking out loud about different situations.”

Ang mga taho kabahin sa giingong moretiro na si Pacquiao gibase sa interbyu ni TV host ug actress Toni Gonzaga kang Pacquiao sa programang “Toni Gonzaga Studio” nga gi-post ni Gonzaga sa iyang YouTube channel.

“Kung sakaling manalo po kayo bilang presidente ng Pilipinas, paano po yung boxing career niyo? Magbo-boxing pa rin po ba kayo?” pangutana pa ni Gonzaga kang Pacquiao.

Ang fighting senator daling nakatubag, “Boxing career ko? Tapos na ‘yung boxing career ko.”

Gipasabot sa 42-anyos nga si Pacquiao nga dugay na kaayo siya sa pamoksing ug dugay na sab nga nanghinaot ang iyang pamilya nga moundang na siya pag-away.

Niadtong Domingo, Septiyembre 18, 2021, pormal nga gidawat ni Pacquiao ang nominasyon sa Partido ng Demokratikong Pilipino-Laban (PDP-Laban) nga himuon siyang presidential candidate sa partido, nga gipangulohan ni Senator Aquilino “Koko” Pimentel III. (JBM)