MAHIBALIK ang kabangis ni Filipino boxing icon Manny Pacquiao sa ibabaw sa ring sa higayon nga ikaharong na niini si American Keith Thurman karong Hulyo 21 (RP time) sa MGM Grand Garden sa Las Vegas, USA.

Mao kini ang gipaneguro sa trainer ug suod nga higala sa Pambansang Kamao ng Pilipinas nga si Buboy Fernandez.

Nagkanayon si Fernandez nga naglungotlungot ang bugtong 8-division world champion sa mga pasiatab ni Thurman ug nakahatag kini’g maayong resulta sa ilang training camp.

Gipasabot ni Fernandez nga nagsugod ang kapungot ni Pacquiao dihang nihatag og mainitong mensahe si Thurman ngadto sa fighting senator sa usa ka press conference niadtong Mayo sa Beverly Hills.

“Ipapako daw niya si senator sa krus at saka mawawala na lang daw sa larangan ng boxing kaya mag-senador na lang daw,” asoy ni Fernandez sa www.abs-cbnnews.com.

Matod ni Fernandez nga katapusan niyang nakita si Pacquiao nga adunay kaligutgot sa kontra niadto pang 2006 batok kang Mexican Erik Morales.

“How many years ko na hindi nakita siya na ganyan. ’Yung huli pa nu’ng Morales 3 pero mas grabe ito,” batbat ni Fernandez.

“Sa ipinakita niyang galit, inis at asar niya, ibang Manny Pacquiao ang nakakausap ko. May halong ibig sabihin ’yung mga suntok niya.”

Kon kahinumdoman, gitataw ni Pacquiao nga ang mga pasiatab ni Thurman nakahatag kaniya og dugang kadasig sa training.

“Iba ito. Na-ano ako . . . ’yung para bang na-motivate ako because of what he said to me. Gusto ko magkaroon siya ng respeto sa akin pagkatapos ng fight,” matod ni Pacquiao. (ESL)