KASAMTANGANG gipang-quarantine ang pamilya ni Senador Manny Pacquiao didto sa ilang panimalay sa Makati City.

Kini human sa awhag sa mga opisyales sa ilang barangay human masuta nga nakabisita sa ilang panimalay si Senador Koko Pimentel atol sa usa ka party sa sayong bahin ning semanaha.

Si Pimentel nagpositibo sa coronavirus.

Hinuon, gipahibawo ni Pacquiao nga negatibo siya sa gipahigayon testing sa coronavirus.

Subay niini, mapasalamaton si Pacquiao sa mga Filipino nga misunod sa mga lagda sa gobiyerno kalabot sa pagpatuman sa enhanced community quarantine didto sa Luzon.

Sa iyang video message, ang boxing legend subling mipahimando sa mga tawo sa pagsalig sa Kahitas-an ning panahon sa krisis.

Sa samang higayon, kinasingkasing nga gipasalamatan ni Pacquiao ang Chinese billionaire nga iyang higala nga si Jack Ma kinsa midonar og 57,000 ka mga testing kits ug 500,000 ka face masks alang sa mga frontliners sa Pilipinas. (JBM)