MALAUMON si Philippine Basketball Association (PBA) Commissioner Willie Marcial nga makabalik ang liga karong tuiga, labing sayo sa Septiyembre.

Kini human gitugtan sa gobiyerno nga makapraktis na ang miyembrong teams sa liga ubos sa estriktong health protocols isip paglikay sa coronavirus disease 2019 (Covid-19).

Ning bag-uhay lang, giaprubahan sa Inter-Agency Task Force on Emerging Infectious Disease (IATF) ang gisumiter sa PBA nga health protocols nga ilang pagasundon atol sa praktis sa teams.

Matod ni Marcial nga mahinungdanon nga maka-training ang mga magduduwa una kini mobalik sa aksyon.

Gipasabot ni Marcial nga delikadong mangaangol ang mga magduduwa kon moderetso kini'g kombati nga wala sa saktong kondisyon.

"Kailangan natin mag-ensayo muna 'yung mga players kasi magkaka-injury yan pag binigla natin," batbat ni Marcial sa interbyu sa GMA News Online.

Asoy ni Marcial nga nagsubay sa saktong dalan ang liga basi sa ilang mga plano kabahin sa ilang pagbalik.

Sa panahom ni Marcial, makasugod na sa hugot nga pag-ensayo ang mga magduduwa sa ulahing bahin ning buwana.

Sa dili pa niini, asoy ni Marcial nga magpatawag una siya og panaghugpong sa team officials ug Board of Governors aron ihan-ay ang tanang angayan nilang pagabuhaton.

"Sana nga by September or October makabalik na tayo, pero depende 'yun sa Task Force," pasabot ni Marcial.

Asoy ni Marcial nga labing seguro, ilahang pamub-an ang season sa duha na lang ka mga komperensiya gikan sa naandan nga tulo. (ESL)