ABLIHAN na sa Philippine Basketball Associations ang ilang ganghaan para sa gustong moduso sa ilang application form sa season 46 sa PBA draft, Disyembre 7, 2020.

Ang maong adlaw maoy maghatag og agianan sa mga aplikante nga local ug Filipino-foreign players kinsa adunay usa ka buwan para ilang makumpleto ang mga requirement sanglit sa Enero 27, 2021 na ang deadline.

Ang rookie draft gikatakdang ipahigayon sa Marso 14, sunod tuig.

Ang rookie application ug pamaagi sa pag-draft labi na niining panahon sa pandemya dala sa Covid-19, maoy usa sa mga agenda nga gihisgotan sa PBA Board ilawom sa liderato ni Chairman Ricky Vargas kinsa nakigtagbo kang Commissioner Willie Marcial niadtong Huwebes.

Base sa inisyal nga nasabotan, gipadaplin una ang rekisito sa mga aplikante nga kinahanglan nga makaduwa sila sa PBA D-League sa dili pa sila makasalmot sa drafting. (PAC)