Mikulit og kasaysayan ang bag-ong natukod nga Professional Chess Association of the Philippines (PCAP) dihang malampuson niining napahigayon ang ilang labing unang opisyal nga torneyo niadtong Enero 16, 2021.

Ang PCAP, nga maoy labing unang professional chess tournament sa Pilipinas ug tibuok South East Asia, mipahigayon sa ilang kompetisyon sa online gumikan sa padayong hulga sa COVID-19 pandemic.

Miabot sa 24 ka teams ang nagpinug-anay og singot sa utok sa unang komperensya sa torneyo. Ang PCAP, nga naporma niadtong Hulyo 28, 2020, mopahigayon og tulo ka mga komperensya alang sa 2021 season.

Sa first round, ang partisipanteng teams gibahin sa duha ka mga grupo – ang North ug South divisions.

Lakip sa mga ningsalmot gikan sa South mao ang Cebu City Machers, nga gipangulohan ni NM Elwin Retanal, Lapu-Lapu City Naki Warriors, ug Cordova Dutchess Dagami Warriors. (ESL)