PAREHONG ningbida sila si BJ Pepito ug Jonjon Adlawan human nila gipatigbabawan ang ilang tagsatagsa ka kategoriya sa MS Motosuit 21st Calambua Motocross Cup niadtong Dominggo sa Barangay Calambua, lungsod sa San Remigio, Cebu.

Si Pepito, kinsa pambatong rider gikan sa Daanbantayan, Cebu, maoy midominar sa expert category.

Ang 17 anyos nga kanhi ‘Rider of the Year’ sa MS Motosuit Motocross Series milupig sa laing mga dekalidad nga riders nga sila si Adlawan ug Denmark Supatan nga maoy miangkon sa ikaduha ug ikatulong luna.

Hinuon si Adlawan nakabawi kang Pepito pinaagi sa pagdaog sa pro open class diin midakin-as si Pepito sa ikaduhang dapit. Si Supatan mao gihapon ang niangkon sa ikatulong dapit ning maong kategoriya.

Ang amahan ni Adlawan nga si Jonas mikawat sab og atensyon pinaagi sa pagsakmit sa titulo sa Executive A division.

Ang ubang executive winners mao sila si Arnel Enriquez (B) ug Rex Gamallo (C).

Mibida sab si Earjun Codinera pinaagi sa paghakot og duha ka mga titulo gikan sa intermediate ug novice open production.

Ningdaog sab sila si Brylle Ornopia sa beginners production, John Hisoler sa local enduro, Rio Mahinay sa open enduro, Rajah Garin sa mini class 85cc, Lhaz Nadela sa mini class 50cc, Sharlet Gallarde sa ladies division, Eric Gabuya sa underbone race ug Rey Pepito sa buggy class.

Gikan sa Calambua, ang kulbahinam nga mga aksyon ning maong lumba motapon sa Medellin alang sa 2019 Mayor Joven Mondigo Invitational Motocross karong Abril 28. (ESL)