NAGKINAHANGLAN lang og duha ka mga adlaw ang Pilipinas aron labwan ang gold medals nga nahakot niini sa Southeast Asian Games duha ka mga tuig ang nakalabay sa Kuala Lumpur, Malaysia.

Sa premirong adlaw pa lang sa 2019 Seag, ang Pilipinas, nga maoy host, nakapundo na dayon og 23 ka gold medals.

Unya mga alas 5:00 sa hapon kagahapon, ningburot na sa 32 ka ka gold medals ang nakuha sa Pilipinas.

Niadtong 2017 sa Malaysia, igo ra’ng nakatigom ang Pilipinas og 24 ka gold medals sa kinatibuk-ang kompetisyon.

Ning higayuna, ang Pilipinas nagtinguhang malangkat pagbalik ang overall title nga katapusan niining naangkon niadtong 2005 nga edisyon nga gipahigayon sab dinhi sa nasod.

Ang kalampusan sa Pilipinas niadtong higayuna gitawag og ““2005 Miracle.”

Si Philippine Olympic Committee president Abraham “Bambol” Tolentino naa karon sa Pilipinas ang momentum human sa dominanteng gipakita sa Pinoyng mga atleta sa premirong adlaw sa kompetisyon.

“Of course that performance from our athletes on Day 1 was very great. With that, you can see the momentum is on our side. Getting 100 gold medals is doable for us,” matod ni Tolentino.

Ning pagsuwat, ang Pilipinas mirehistro na og 31-15-9 gold-silver-bronze medal tally.

Nagsunod ang Vietnam nga adunay 10-17-13 nga medal tally dayon ang Indonesia nga adunay 6-8-7 tally.

Ang Sugbuanong mga atleta nakatampo og upat ka gold medals alang sa Pilipinas.

Usa niini gikan ni Dexler Bolambao sa arnis unya tulo gikan nila ni Pearl Marie Cañeda ug Wilbert Aunzo sa dancesport.

Ang laing mga Sugbuanon nga sila si triathlete Andrew Kim Remolino ug mountainbiker Nino Surban nakatunol og silver medals.

Karong adlawa, duha ka mga Sugbuanong mga atleta nga sila si John Fabuar Ceniza ug Elreen Ann Ando ang mosugod sa ilang kampanya sa weightlifting event sa Ninoy Aquino Stadium.

Nagkanayon si national weightlifting team head coach Ramon Solis nga siyento porsiyento nang andam ang iyang mga batos.

“We have prepared well for this tournament. They’re ready. I don’t want to predicate or get ahead of something, but I’m sure that they will give there all for this competition,” matod ni Solis.

Hinuon giangkon ni Solis, kinsa usa ka kanhi Olympian, nga dili sayon nga tahas ang sagubangon sa iyang mga batos.

Nalantawan ni Solis nga ang labing lig-on nilang kaparang ning maong 11-nation event mao ang Vietnam. “There are many competitors from Vietnam. There are about 10 of them,” matod niya. (RSC, ESL)