MAGPAHIGAYON og public workout ang nag-unang mga protagonsita sa Pinoy Pride 45: Triple WBO Championships sugod karong alas 5:00 sa hapon sa activity center sa Robinsons Fuente.

Ning maong kalihukan, ang mga mahiligon og boksing makasiplat kon unsa’y ilang puwedeng masaksihan sa promosyon nga gikatakda karong Nobiyembre 24 sa IEC Convention Center sa Brgy. Mabolo, dakbayan sa Sugbo.

Mangulo sa mga mopakita og aksyon sa public workout mao si ALA fighter Jeo “Santino” Santisima (16-2, 14KOs) kinsa moaway sa main event sa promosyon aron depensaan ang iyang WBO Oriental super bantamweight title batok kang Mexican Uriel “Yuca” Lopez (13-6-1, 6KOs).

Mao kini ang labing unang depensa ni Santisima sa titulo nga iyang naangkon pinaagi sa 6th round TKO nga kadaugan batok kang Thai Likit Chane niadtong Hunyo 9 sa Pinoy Pride 44 sa Maasin City.

Motunga sab sa workout sila si “Prince” Albert Pagara, Kevin “KJ” Cataraja, “King” Arthur Villanueva ug Jonas “Zorro” Sultan nga pulos moaway sa maong promosyon. ESL