NAKAABANTE sa quarterfinals ang Pinoy rower nga si Chris Nievarez human siya nahiluna sa ikatulong dapit sa Heat 5 sa rowing men’s single sculls event sa Tokyo Olympics Games regatta kagahapon sa Sea Forest Waterway sa Japan.

Ang mopatigbabaw lang nga tulo sa matag heat – adunay unom ka heats – mao ang makasaka sa sunod round.

Ang 21 anyos nga si Nievarez mitali og pito ka mga minutos ug 22.97 ka mga segundos sa ilang tapok nga gipatigbabawan ni 2016 silver medalist Damir Martin sa Croatia, kinsa adunay 7:09.17 nga oras.

Si Alexander Vyazovkin sa Russian Olympic Committee maoy miangkon sa ikaduhang dapit nga adunay oras nga 7:14.95.

Ang resulta usa ka maanindot nga musika alang sa kampanya sa Team Pilipinas, nga padayon pang nangandoy nga makabaton sa labing unang gold medal niini sa matag upat ka mga tuig nga kompetisyon.

Si Nievarez, kinsa gold medalist sa 2019 Southeast Asian Games, maoy labing una sa 19 ka Pinoyng mga atleta nga nipakita og aksyon sa Tokyo Games.

Ang quarter-finals ipahigayon karong Lunes, Hulyo 27, 2021. (ESL)