MAAKTIBO og balik ang amateur boxing sa Sugbo sa pagpapahigayon sa matag buwan nga Philippine Sports Commission (PSC) Visayas amateur boxing event sugod karong Agusto 19 sa Cebu City Sports Center boxing gym.

Mapasigarbuon kining gianunsyo ni Amateur Boxing Alliances of the Philippines (Abap) Central Visayas head ug Philippine Sports Commission (PSC) coordinator in-charge of boxing development Lorenzo “Chao” Sy.

Gipasabot ni Sy nga ang PSC amateur boxing program lahi sa Cebu Amateur Boxing Revival nga iyang gisunod sa kanhi proyekto ni Cebu boxing patron Antonio Aldeguer.

Nagkanayon si Sy nga ning maong lakang, matuman sa PSC nga makamugna og kompetisyon nga alang sa dekalidad nga amateur boxers rehiyon.

Nagkanayon si tournament manager Serafion “Jungkoy” Cortes nga ang age categories mao ang 12 years old and under, 13-14, ug 15-16.

Ang PSC amateur boxing mohangop sab sa babayeng mga boksidor.

Asoy ni Sy nga nangayo na sila sa nagkadaiyang boxing clubs og listahan sa babayeng mga boksidor niini.

Alang sa mga interesado, mahimong motawag sa cell no. 0942-205-8751 o mosumiter og listahan sa Hotel Fortuna front desk sa Borromeo St., ning dakbayan.

Sa laing bahin, gipahibalo ni Sy nga hapit nang ablihan ang PSC Boxing Training Center sa Peace Valley sa Lahug. ESL