NAKATAAK sa National Basketball Association (NBA) Finals sa labing unang higayon ang host Toronto Raptors human nila giusban pagbuntog ang No.1 team Milwaukee Bucks, 100-94, sa Game 6 aron humanon ang ilang Eastern Conference finals series, 4-2, kagahapon.

Nagpakatap si Kawhi Leonard og 27 puntos ug 17 rebounds aron pangulohan ang Raptors sa pagsakmit sa labing una niining Eastern Conference title sukad sa ilang pagsulod sa liga niadtong 1995.

Si Pascal Siakam nidugang og 18 puntos alang sa Raptors, niamot og 17 puntos si Kyle Lowry samtang nitampo og 14 puntos si Fred VanVleet.

Ang Raptors nabiyaan dayon og 15 puntos sa sayong bahin sa 2nd quarter unya sa hinapos nga bahin sa 3rd quarter, naggukod gihapon sila og 14 puntos.

Human niini, ang Raptors ningposte og 26-3 nga rally nga gituldokan og hansak ni Leonard gikan sa assist ni Lowry nga naghatag kanila og 87-79 nga labaw sa nahabiling 6:46 minutos.

“It was kind of a momentum capper,” matod ni Lowry. “We were on a run, and why not feed the big dog? Let the big dog eat.”

Nakapanghudlat pa man tuod ang Bucks apan gipenuro sa Raptors nga dili na nila mabuhian ang labaw hangtod na katapusang gutlo.

Sa NBA Finals, nga sugdan karong Biyernes, Mayo 31 sa Toronto, ang Raptors makigharong sa two-time defending champion Golden State Warriors.

“They’re one of the greatest teams in history,” matod ni Raptors coach Nick Nurse kabahin sa Warriors. “It will be a tall task, but we’ll try to figure it out.”

Ang Raptors kanunay man unta makasulod sa playoffs sa nangaging katuigan apan kanunay lang sab sila pakyason ni LeBron James ug sa Cleveland Cavaliers.

“It’s taken a long time to get here in my career,” matod ni Lowry. “I’ve run into one guy for a while.”

Sa iyang gipakitang sakripisyo ug determinasyon, si Leonard nakadawat og dakong pagdayeg gikan sa iyang big boss nga si Masai Ujiri.

“He’s the best player in the league and we’re happy he’s in Toronto,”matod ni Ujiri.

Mapasalamaton si Leonard sa pagdayeg ni Ujiri ngadto kaniya. “I just want to win. I don’t care about being the best player. I want to be the best team,” asoy ni Leonard. (AP, ESL)