MGA duwa karon:

5:15 pm- UV batok CITU (High School)

6:45 pm- UV batok USPF (College)

Pahugtan og suway sa defending champions University of the Visayas (UV) Green Lancers ang ilang paggunit sa solong liderato sa ilang pagpakigbatok sa University of Southern Philippines Foundation (USPF) Panthers sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Ang Green Lancers, nga nagtinguha og four-peat karong tuiga, kasamtangang nag-una sa standing dala ang 5-1 nga rekord samtang ang Panthers adunay 3-4 nga rekord.

Ang Green Lancers nagtinguha sa ikalima nilang sunodsunod nga kadaugan human sila naangkon ang bugtong nilang kapildihan batok sa University of Cebu (UC) Webmasters, 64-72, niadtong Septiyembre 15.

Human niadto, ang Green Lancers namungot og maayo ug ilang gipangmakmak ang nagsunod nilang gikaharong lakip na ang Panthers, nga ilang gipanglubong og taga liog, 102-82, sa premiro nilang duwa niadtong Oktubre 1.

Dominado man tuod sa Green Lancers ang una nilang panag-abot sa Panthers apan ning-ulbo gihapon ang kainit sa ilang dugo nga maoy hinungdan nga nanga-thrown out ang duha sa ilang mga beterano nga sila si Gileant Delator ug Jiesel Tarrosa.

Agi’g bugti sa ilang nabuhat, napahamtangan sila si Delator ug Tarrosa og automatic one-game suspension nga moepekto ning higayuna.

Ang Panthers mosuway og bangon gikan sa ilang 61-77 nga kapildihan batok sa University of San Jose Recoletos (USJ-R) Jaguars niadto lang lang Sabado, Oktubre 5.

Ning maong duwa, wala nakapakita og aksyon ang impresibong import sa Panthers nga si Sameen Swint gumikan kay nawala ang uniporme niini ug wala kini tugti nga mogamit og uniporme sa iyang kauban.

Si Swint mobalik na’g duwa ning higayuna nga gikinahanglan gyud sa Panthers hilabi na kay ikaharong nila’g balik ang lig-ong puwersa sa Green Lancers.

Sa premirong duwa, ang UV Baby Green Lancers makigbatok sa Cebu Institute of Technology University (CITU) Wildkittens alang sa high school division.

Ang Baby Green Lancers adunay 4-2 nga rekord samtang ang Wildkittens naggunit og 1-4 nga baraha.

Dili ikalimod nga grabe ka inilog ang Baby Green Lancers batok sa Wildcats apan labing seguro, nakat-on na sila sa nahitabo sa miagi nilang duwa diin gipakaging sila sa Don Bosco Technological Center (DBTC) Greywolves, 61-67. (ESL)