MISULBONG ang Houston Rockets ngadto sa semifinals round sa western Conference sa National Basketball Association (NBA) human nila mapukan ang Utah Jazz, 100-93, sa Game 5 aron tapuson ang ilang first round playoffs series,4-1.

Si James Harden mikolekta og 26 puntos alang sa Rockets kinsa nagpaabot na karon sa modaog sa laing semis match tali sa Los Angeles Clippers ug Golden State Warriors.

Sa kasamtangan, ang Warriors nga napildi kagahapon sa Los Angeles Clippers, 129-121, pabilin nga mao gihapon ang naglabaw sa ilang series, 3-2.

Motapon og balik ang ilang best-of-seven series didto sa korte sa Los Angeles ugmang adlawa alang sa Game 6.

Ang Rockets perming naglabaw apan sa katapusang minuto gihudlat kini sa Jazz human sa short jumper ni Ricky Rubio, 94-93.

Ang pagkasipyat sa duha ka free throws ni P.J. Tucker naghatag og dakong kakulba sa Rockets apan suwerte kini nga nakakuha sa offensive rebound ug wa dayon nakakuha kini og foul.

Ug ning higayona, bugnaw ug siniguro na kini niyang gikompleto aron inaton ang bintaha, 96-93, ug ang blocked shot ni Harden ngadto ni Ruby Gobert maoy nagtibwas sa paglaom sa Jazz.

Si Clint Capela solidong nakasuporta ni Harden sa opensa pinaagi sa iyang 16 puntos ug 10 ka rebounds.

Sukwahi sa nasinating kadaugan sa Rockets, ang Warriors napakyas sa ilang tinguha nga makahulbot og luna alang sa sunod round human sa ilang kapildihan sa Clippers.

Ang Clippers maoy nagkontrolar sa duwa apan sa kalit lang nikulapso kini sa katapusang singko minutos sa fourth quarter sa dihang nagkumboya sila si Kevin Durant, Stephen Curry.

Apan ang four-point play ni Lou Williams sa 1:29 nga nahabilin sa duwa maoy naghulma sa lungag nga ilang gihimong lutsanan paingon sa kadaugan.

Si Williams sa kinatibuk-an mitapos sa duwa nga may 33 puntos ug 10 ka assists samtang miabag kaniya sila si Danilo Gallinari nga may 26 puntos nga gilamasan og pito ka rebounds ug Montrezl Harrell nga mitapik og 24 points nga may duha ka hansak sa krusyal nga mga minutos.

Ang kapildihan sa Warriors maoy mitabon sa playoff career nga 45 puntos ni Kevin Durant. Si Patrick Beverly, gawas sa iyang 17 puntos, maayo usab kaayo kining nakadepensa ni Klay Thompson ilabi sa katapusang 1:40. (JBM, AP)