NAGPASALAMAT si Rajon Rondo sa higayon nga gihatag sa Los Angeles Lakers kaniya pila ka oras sa wala pa siya pormal nga ma-trade didto sa Atlanta Hawks.

Ang beteranong point guard mitabang sa Lakers aron langkaton ang ika-17 nga franchise title niini sa NBA “bubble” season didto sa Walt Disney World Resort sa Orlando, Florida.

Gilupig sa Lakers and Miami Heat sa Game 6 sa NBA Finals niadtong Oktubre aron aswaton ang Larry O’Brien Trophy. Ang maong kampiyonato maoy nakapatabla sa rivals nga Lakers ug Celtics nga pulos na adunay 17 ka NBA title.

Si Rondo nahimong kampiyon sa Lakers ug Celtics. Siya parti sa 2008 championship sa Boston kauban sila Kevin Garnett, Paul Pierce, Ray Allen, Tony Allen ug Kendrick Perkins.

“Thank you to the Lakers organization, Jeanie and Rob, for giving me the opportunity to play for an incredible franchise. The professionalism and support from Frank, the coaching staff and support staff is something I’m truly grateful for,” suwat ni Rondo sa iyang Instagram account.

Si Rondo mipirma og duha ka tuig nga kontrata sa Hawks nga gabalor og $15 milyones.

“With the guys, there’s an amazing brotherhood that only we know,” dugang ni Rondo sa iyang post nga adunay litrato kaniya ug sa iyang Lakers teammate nga gagunit sa NBA trophy.

Sulod sa iyang 14 ka tuig sa liga si Rondo nakaduwa na og pito ka teams nga mao ang Boston, Dallas Mavericks, Sacramento Kings, Chicago Bulls, New Orleans Pelicans, Los Angeles Lakers ug Atlanta Hawks.