NAGPADAYON og kaamag ang dalan sa Meralco Bolts nga makasulod sa sunod round human kini mikutlo na usab og laing kadaugan pinaagi sa pagpukan sa naghingutas nga Rain or Shine Elasto Painters, 91-82, sa PBA Governor’s Cup sa Araneta Coliseum kagabii.

Sa kadaugan, ang Bolts nakapuwesto na sa ikasiyam nga luna nga dala ang 4-6 nga baraha samtang ang Rain or Shine nahagsa sa 2-6 nga standing.

Nagtabla 74-74, sa nahabiling 8:27 segundos sa fourth quarter, ang Bolts ni coach Norman Black mipabuto og 16-3 nga rally nga maoy nahimo nilang likoanan paingon sa ikatulo nilang sunodsunod nga kadaugan.

“It’s just another step,” matod ni Black atol sa post-game interview. “Now we put ourselves in a position where we have a chance for the playoffs.”

Si Allen Durham mihagpat og 19 puntos, 20 ka rebounds ug unom ka assists samtang si Mike Tolomia mipupo og 17.

Si Norbert Torres nangulo sa Rain or Shine nga may 16 puntos, samtang ang ilang import nga si Terrence Watson aduna 14 puntos ug 13 ka rebounds. Mga puntos:

Meralco (91) - Durham 19, Tolomia 17, Hodge 14, Newsome 12, Caram 11, Hugnatan 10, Salva 4, Amer 2, Jamito 2, Ballesteros 0.

Rain or Shine (82) - Torres 16, Watson 14, Nambatac 13, Daquioag 10, Ponferada 7, Ahanmisi 7, Yap 7, Norwood 6, Borboran 2. (JBM)