GIPAGAWAS na sa Samahang Basketbol ng Pilipinas (SBP) ug Philippine Basketball Association (PBA) ang listahan sa 24-man national pool alang sa kampanya sa nasod sa first phase sa Fiba Asia Cup qualifiers nga ipahigayon sa sunod buwan.

Nag-una sa listahan ang mga napili sa special rookie draft sa PBA nga sila si Isaac Go, Rey Suerte, Matt Nieto, Mike Nieto, ug Allyn Bulanadi.

Ang mga magduduwa sa PBA nga nahilakip sa listahan mao sila si Marc Pingris, Japeth Aguilar, Troy Rosario, Kiefer Ravena, Poy Erram, Matthew Wright, RR Pogoy, Ray Parks, CJ Perez, Mac Belo, ug Christian Standhardinger.

Samtang ang collegiate players mao sila si Kobe Paras, Juan Gomez de Liaño, Javi Gomez de Liaño, Dave Ildefonso, Dwight Ramos, ug Justin Baltazar.

Mokompleto sa listahan mao sila si Thirdy Ravena ug Jaydee Tungcab, kinsa parehong bag-o lang nakahuman sa ilang UAAP season.

Matod ni PBA commissioner Willie Marcial nga na-finalize ang listahan niadtong Huwebes atol sa board meeting kauban si SBP president Al Panlilio.

Hinuon gitataw ni Marcial nga hangtod karon, wala pa nakadesisyon ang SBP kon kinsa ang kuhaong interim coach aron mogiya sa Gilas Pilipinas 1st phase.

Ang Gilas Pilipinas nahilakip sa Group A kauban ang Indonesia, Thailand, ug Korea.

Ang Gilas mo-host sa Thailand karong Pebrero 20 unya moasdang sa Indonesia karong Pebrero 23. / ESL