MIREHISTRO og perpektong 14 match points ang Team Sagay sa Negros Occidental aron angkunon ang kampiyunato sa Salon de Rose Christmas Tatluhan Chess Tournament nga nahuman niadtong Dominggo, Disyembre 8, 2019 sa Barracks Chess Club sa Robinsons Galleria Cebu.

Sa ikapito ug final round, ang Board 1 sa Team Sagay nga si International Master (IM) Joel Pimentel Jr. igo ra untang nakatabla batok kang National Master (NM) Edsel Montoya sa DPWH Team B.

Hinuon ang Board 2 sa Team Sagay nga si Romeo Sadia III midaog batok kang Vizco Ceferino Jr. ug hasta ang ilang Board 3 nga si Amalio Bayot batok kang Rafael Perez.

Sa kalampusan, ang Team Sagay nakadaog og P30,000.

Niangkon sa ikaduhang dapit mao ang University of San Jose Recoletos (USJ-R) Jaguars nga nakatigom og 12 match points.

Ang USJR Jaguars, nga nakabulsa og P20,000 nga ganti, gilangkuban nila ni Board 1 Rogelio Enriquez Jr., Board 2 Jetro Esplanada, ug Board 3 Patrick Chua.

Ang Salon de Rose Team B maoy nakaangkon sa ikatulong dapit ug P10,000 nga ganti.

Nagtabla unta ang Salon de Rose Team B ug OK Kaayo sa 11 match points apan mingdaog ang Salon de Rose Team B sa total board points nga maoy nagbuak og panagtabla.

Naglangkob sa Salon de Rose Team mao sila si Board 1 Cyril Ortega, Board 2 Mark Mangubat ug Board 3 Ed Vincent Lepalam.

Ang duha ka mga adlaw nga kompetisyon nagsilbeng dalit sa Kapaskuhan ni Cebu chess patron Benjamin “Bojie” Lim, tag-iya sa Salon de Rose.

Dul-an sa P100,000 ang kinatibuk-ang ganti sa kompetisyon, nga gisalmutan og 47 ka teams gikan sa sa Sugbo, Bohol ug Negros. (ESL)