NAKADAWAT og talagsaong tanyag ang security guard sa Golden State Warriors arena nga si Jonathan Amey Jr. dihang gipa-tryout siya sa G League team sa Golden State, ang Santa Cruz Warriors.

Si Amey, kinsa nagtrabaho isip sikyu sa Chase Center, maoy motabang sa mga magduduwa sa Warriors sa pagpahiluna sa ilang tagsatagsa ka sakyanan sa parking area.

Luyo sa iyang pagka-sikyu, adunay pangandoy si Amey nga mahimong professional basketball player.

Sa wa pa siya motrabaho isip sikyu, miduwa siya isip pointguard sa Intramural team sa Cal State East Bay.

Wa hinuon makasulod sa final cut sa Santa Cruz roster si Amey apan gikalipay na niya nga kausa sa iyang kinabuhi nalakip siya sa prospect players alang sa pro team.

Matod sa 6-foot-1 nga si Amey sa interbiyu sa BleacherReport, nindot na nga kasinatian alang kaniya nga makaduwa sa pro level.

Dugang pa sa 26-anyos nga wala niya damha nga mahitabo kini sa iyang kinabuhi kay nagtutok man siya sa pagka-sikyu.

Mismong ang pambato sa Warriors nga si Stephen Curry midayeg kang Amey ug mibilib sa iyang motibasyon. (RSC)