MGA duwa karon:

Mall of Asia Arena

4:30 pm. - Columbia vs. Blackwater

7:00 pm. - Magnolia vs. San Miguel Beer

Panagtakos tali sa duha ka mga higanting teams ang masaksihan karong gabii sa nagpadayon nga PBA Governor’s Cup sa Mall of Asia Arena.

Kini sa dihang mag-abot ang sister-company San Miguel Beer ug ang Magnolia Hotshots sa main attraction sa double-header.

Ang Beermen, usa sa duha ka teams nga wala pa makaangkon og kapildihan ning maong conference, samtang ang Magnolia mipupo og sunodsunod nga daog human sa ilang pagkapukan sa opening match batok sa Meralco. Alang kang coach Chito Victolero nga ang ilang munasaginhawa nga kadaugan batok sa Alaska Aces, 95-90, niadtong Dominggo maoy naghatag kanila og leksiyon nga ilang magamit batok sa Beermen.

Sa iyang bahin, si coach Leo Austria sa San Miguel Beer, mipadayag usab sa ilang kaandam batok sa Magnolia human sa ilang kulbahinam nga kadaugan batok sa Nlex Road Warriors, 98-94, didto sa Dubai.

Samtang sa preliminary match, krusyal nga panagtigi ang sagubangon sa Columbian Dyip ug Blackwater Elite nga sugdan sa alas 4:30 sa hapon.

Bisan tuod og adunay hilanat si Columbian coach Johnedel Cardel apan wala kini makapugong kaniya sa pag-supervise sa ilang praktis kagahapon sanglit importanti alang kanila ang kadaugah batok sa Elite aron pagpalig-on sa ilang paghupot sa ikaunom nga puwesto, 3-2.

Apan dili kini sayon batok sa Blackwater kinsa lab-as pa gikan sa ilang 107-98 nga kadaugan batok sa NorthPort niadtong Sabado. (JBM)