Tulo na ka bakos ang anaa sa kamot ni Errol Spence Jr. --ang welterweight World Boxing Council (WBC), International Boxing Federation (IBF) ug ang World Boxing Association (WBA).

Kini human niya gipaundang sa 10th round si Yordenis Ugás, ang boksidor nga milupig kang boxing icon Manny Pacquiao sa miaging tuig.

Nadepensahan ni Spence ang iyang WBC ug IBF nga titulo samtang nailog niya ang WBA nga bakos ni Ugás kagahapon didto sa Arlington, Texas.

Gipuntirya ni Errol Spence Jr. ang mihubag nga walang mata ni Ugás hangtod nga gihunong na ni referee Laurence Cole ang away sa 1:44 sa 10th round.

Unang gi-check ang mata ni Ugás sa ikawalong round, niadtong higayona gitugotan pa ang Cuban boxer nga ipadayon ang duwa.

Sa ikaduhang higayon nga pagtan-aw sa iyang mata sa 10th round, didto na gihukman nga undangon na ang duwa.

Nagpabiling walay pilde si Spence sulod sa 28 ka away ug nagkaduol kini sa prestihiyosong undisputed title.

Makuha ang undisputed title kon makompleto ang upat ka major world titles—WBC, IBF, WBA ug ang World Boxing Organization (WBO) nga gikuptan ni Terence Crawford (38-0, 29 knockouts).

Ang panag-abot ni Spence ug Crawford mahimo unyang sangka sa mga walay pilde alang sa undisputed crown.

Ang 35-anyos nga si Ugas nahagsa ngadto sa 27-5 nga rekord ug mibiya kini sa stadium sakay sa ambulansiya padung sa local hospital.