Nagkanayon si American world champion Errol Spence Jr. nga wala na siya’y interes nga makig-away ni Filipino boxing legend Manny Pacquiao.

Nabuhi pagbalik ang posibleng panagharong sa duha ka mga boksidor human nipadayag ang Pambansang Kamao ng Pilipinas nga posible siyang molugnot gikan sa pagretiro aron moaway pagbalik sa professional rank ning bag-uhay lang.

Nakatakda na untang magharong ang duha niadtong 2021 apan wala kini nadayon human naangol ang mata ni Spence.

Nihulip kang Spence mao si Cuban Yordenis Ugas, kinsa surpresang nilupig sa 8-division world champion pinaagi sa unanimous decision.

Sa pagkakaron, giklaro ni Spence nga dili na siya ganahan makig-away ni Pacquiao ug iyang gikumpara ang ilang panagparang sa 1980 heavyweight title fight nila ni Muhammad Ali ug Larry Holmes.

Niadtong higayuna, batan-on pa si Holmes unya paingon nang motiklop ang karera ni Ali. Ang resulta, gipaundang ni Holmes si Ali sa 10th round.

Sa kasamtangan, si Spence nag-edad og 32 samtang 44 si Pacquiao.

Nagtuo si Spence, kinsa maoy tag-iya sa welterweight titles sa World Boxing Council, World Boxing Association (WBA) ug International Boxing Federation (IBF), nga kon makig-away siya og edaran nga superstar, hayan makaapekto kini sa iyang dungog.

“Like you can see the stigma that—Larry Holmes is one of the greatest fighters of all time. I feel like he don’t get the respect that he deserves. Or like people just don’t regard him. People really don’t just talk about him.”/