ADUNAY dakong kalamboan sa natad sa paugnat sa kusog ang gipahibalo sa national government kagahapon.

Gianunsiyo ni Presidential spokesperson Harry Roque nga puwede na makabalik sa training ang mga student-athlete sa mga lugar nga gipaubos sa general community quarantine (GCQ) ug modified GCQ.

Ang Commission on Higher Education (Ched) maoy gitahasan nga mopagawas sa guidelines alang sa maong kamanduan.

Si Jessica Jawad-Honoridez, athletic director sa usa sa labing dakong mga tunghaan sa Sugbo nga mao ang University of Cebu, miingon nga maayo kini nga kalambuan apan ang ilang prayoridad mao gihapon ang kaluawasan sa ilang mga atleta.

“Wala siya’y guarantee kay kita man gani personally hesitant gihapon ta mo-go out tungod sa risk,” matod ni Honoridez sa interbyu sa Superbalita Cebu.

“But I will give it to the parents, sila ang modesisyon kon tugotan na ba nila ang ilang mga anak mag-training.”

Gipasabot ni Honoridez nga aduna gihapo’y risgo kay wala pa ang bakuna unya dili pa angay mag-training kay wala pa may mga duwa.

“Nindot nga development apan ihatag nato ron ang bola sa parents. Ilaha nga desisyon kay safety man sa bata ang atong gihuna-huna,” asoy ni Honoridez.

“Ako personally di ko mo-ingon nila nga mo-practice, ang desisyon anaa na sa parents, dugang niya. Ang uban pud, kinahanglan na’g physical exercise kay for the past months nga naa ra sila sa balay nausab ilang attitude. Ang exercise makaaayo sa mental health.”

Sa televised briefing, si Roque miingon nga pwede na makabalik og praktis ang mga teams sa school leagues sama sa University Athletic Association of the Philippines (UAAP), usa sa labing dakong mga liga alang sa high school ug college athletes.

Tanang lugar sa nasod puwera lang sa Iligan City anaa na karon sa GCQ ug MGCQ hangtod karong Septiyembre 30, 2020.

Sa laing bahin, si Honoridez miingon nga dili pa siya makasulti kon naay scholarship ang mga student-athlete karon nga School Year kay gaagad pa sila sa enrollees ug wala mokolekta ang mga skwelahan og athletic fees sa ilang mga studyante tungod sa pandemiya.

Kadaghanan sa mga tunghaan sa Sugbo nagsalig sa athletic fees aron ipundo sa ilang mga athletic scholars.

“Gabuhat pa ko og proposal and for final approval ni Atty. (Augosto) Go. Ang computation will base on the number of enrolles,” matod niya.

Si Honoridez miingon nga kon walay scholarship, mohatag silag tuition fee discount alang sa ilang mga atleta.