SAGUBANGON na ni Cebuano mixed martial arts (MMA) fighter Allan Albindo ang dakong away nga dugay na niyang gipaabot sa iyang pagpakigbatok kang Manthan Rane sa India sa One Warrior Series karong hapon sa Singapore.

Si Albindo, kinsa lumad nga taga lungsod sa Argao, Cebu, miangkon nga dili kini sayon nga tahas alang kaniya apan dako ang iyang pagsalig nga mopatigbabaw sa kompetisyon.

Ang One Warrior Series usa ka combat reality series nga kombatihan og 14 ka mga sumosulbong nga amateur fighters gikan sa nagkalainlaing nasod.

Ang tulo nga mopatigbabaw sa kompetisyon makadawat og kontrata sa orestihiyusong One Championship ug $100,000 nga ganti matag usa.

Si Albindo, kinsa sakop sa Yaw-Yan Ardigma Cebu, nangandoy nga makasunod sa lakang sa ubang Sugboanong MMA fighters nga nakaaaway sa One Championship, ang labing dakong MMA event sa Asya.

Ang 22 anyos nga si Albindo wala pa’y pilde sulod sa unom ka mga away.

Ubos sa paggiya ni Yaw-Yan Ardigma Cebu founder Master Benigno “Ekin” Caniga, si Albindo hugot nga nagbansaybansay sulod sa duha ka mga buwan alang ning maong tahas.

Si Master Ekin, kinsa maoy kuyog ni Albindo sa Singapore, mipadayag sa iyang dakon pagsalig sa iyang batos. (ESL)