Misikit og maayo sa No. 1 overall spot ang hosts Phoenix Suns human nila gipasawop ang Portland Trail Blazers, 118-117, sa usa sa mga aksyon sa National Basketball Association (NBA) kagahapon, Mayo 14, 2021 (RP time).

Ang Suns ningsaka sa 49-21 nga rekord nga tataw’ng nakahudlat sa Utah Jazz nga kasamtangang maoy naghupot sa No.1 overall seed.

Ang Suns ug Jazz mao na lang ang adunay poruhan nga makalansang sa No. 1 overall, nga nagtangag og benepisyo nga homecourt advantage sa kinatibuk-ang playoffs.

Sa kadaugan, napakgang sab sa Suns ang tinguha sa Trail Blazers nga makaderetso sa playoffs ug malikayan ang play-in tournament. Ang Trail Blazers nagpabilin sa ikaunom nga puwesto sa Western Conference dala ang 41-30 nga rekord apan delikado pa silang maapsan sa Dallas Mavericks (41-29) ug Los Angeles Lakers (40-30) sa inilugay sa nahabiling duha na lang ka mga luna sa deretsong pagsulod sa playoffs.

Ang usa sa labing mga sinaligan sa Suns nga si Devin Booker wala kaayo nakaarte apan nahimo gihapon siyang bayani sa kadaugan dihang napasulod niya ang iyang duha ka nakapadaog nga freethrows sa nahabiling 2.4 segundos.

Ang Suns gipangulohan ni Chris Paul pinaagi sa iyang 26 puntos, ningdugang og 21 puntos matag usa sila si Mikal Bridges ug Cameron Payne samtang niamot og 18 puntos si Booker. (AP)