NAGLARAW ang marathon queen sa Pilipinas nga si Mary Joy Tabal nga mosalmot og duha ka events sa 30th Southeast Asian (Sea) Games nga i-host nasod karong Nobiyembre 30 ngadto sa Disyembre 11 karong tuiga.

Ang kasamtangang gold medalist sa women’s full marathon sa matag duha ka mga tuig nga kompetisyon nagtinguha sab nga modagan sa half-marathon, matod sa dugay na’ng trainer niini nga si national team coach John Philip Dueñas.

Hinuon dili pa kini pinal gumikan kay nagkinahanglan pa sila si Tabal ug Dueñas nga mananghid sa Philippine Athletics Track and Field Association (Patafa), track and field governing body sa nasod.

Sa interbyu sa Sun.Star Cebu, nagtuo si Dueñas nga tugotan ra sa Patafa nga makadagan ang lumad nga taga Bgry. Guba, Cebu City sa 21K ug 42K events.

Niadtong 2017 sa 29th Sea Games sa Kuala Lumpur, Malaysia, ang full marathon ra’y apil sa events nga gikombatihan ug wala’y labot ang half marathon,

Isip usa ka host, ang Pilipinas gitugotan sa mga nag-organisar sa kompetisyon nga makadugang og uban pang events ug gilakip sa Patafa ang half marathon. (RSC, ESL)