ANG pagsumpay sa iyang dominasyon ngadto sa ikapitong tuig maoy target ni Mary Joy Tabal sa dihang ipahigayon karong Enero 19, 2020 ang pinakadugay nga running event sa nasod nga mao ang Milo Marathon sa Tarlac City.

Ang six-time ug kasamtangan kampiyon sa maong lumba sa women’s division mosakbang sa laing mga inilang runners sa nasod nga naglakip ni Christine Hallasgo, ang gold medalist sa 30th Southeast Asian Games nga gipahigayon sa niaging buwan sa New Clark City Sports Complex.

Gilupig ni Hallasgo si Tabal kinsa maoy miangkon sa silver medal sa maong matag duha ka tuig nga kompetisyon.

Ning higayona, dili na unya problema ni Tabal ang kainit sa rota sanglit sugdan ang panagtigi sa alas 3:00 sa kadlawon nga dako kaayo og kalahian kon itandi sa SEA Games nga alas 6:00 na sa buntag gibuhian ang mga runners.

Gipaabot nga ang panagtigi ni Tabal ug Hallasgo maoy mokawat sa atensiyon sa maong panagtigi nga salmotan usab sa mga qualifiers nga nagagikan sa Manila, Subic, Lingayen, Lucena, Batangas City, Cebu City, Iloilo City, General Santos City, Davao City ug Cagayan de Oro City. (JBM, RSC)