NAGPANIKAD na ang mga Sugbuanon ug Cebu-based runners nga morepresentar sa nasod alang sa 23rd Jeju International Tourism Marathon Festival sa Gujwa Life Sports Park sa Jeju Island, South Korea karong adlawa.

Upat ka runners gikan sa Cebu nga sila si Olympian Mary Joy Tabal, Prince Joey Lee, Rafael Pescos ug Ruffa Sorongon ang nahilakip sa 11-man team nga modala sa bandera sa Pilipinas alang ning maong lumba.

Pescos modagan sa men’s Open 42-kilometer, si Lee sa men’s 21K Open samtang sila si Tabal ug Sorongon mosalmot sa 21K women’s open.

Ang upat nangapili nga morepresentar sa nasod human sa 7-Eleven Run Series niadtong Pebrero.

Sa iyang pagsalmot ning maong lumba, si Tabal mosuway pagbuak sa kaugalingon niyang rekord.

Si Tabal gikan nga nag-training sa Italy alang sa iyang pagdagan sa 2018 Asian Games nga mosugod karong Agusto 18 sa Indonesia.

“My goal is to beat my personal best. I have been training in Italy for two months and it’s a great test on my performance,” matod ni Tabal sa interbyu sa Sun.Star Cebu, igsuong buhatan ning mantalaan. (RSC, ESL)