ISIP tabang sa batan-ong mga atleta, ang Sugbuanong Olympian Mary Joy Tabal mihatag og 120 ka parisan sa mga sapatos alang sa mga miyembro sa Philippine Accessible Disability Services Inc. (PADS) kagahapon, Hunyo 4, 2021.

Ang nahatagan mao ang youth members sa PADS dragon boat team atol sa turnover ceremony nga gitawag og #ShoesOfJoy didto sa Naval Forces Central (Navforcen) sa dakbayan sa Lapu-Lapu.

Ang 31-anyos nga si Tabal nakasabot sa gibati sa batan-ong mga atleta kay siya mismo miagi og kalisdanan sa wa pa kini mahimong kampyon sa marathon.

Sigon sa 2017 Southeast Asian (SEA) Games gold medalist, natandog iyang kasing-kasing sa pagkakita sa PADS paddlers nga magtiniil sa ilang training.

“Nagsugod ko sa ubos, nakasuway ko sa kalisod sa kinabuhi sa atleta maong nakasabot ko sa gibati sa mga batan-ong atleta,” mensahe ni Tabal sa mga batan-on.

“Padayon lang ta sa pagpaningkamot aron atong maabot ang atong mga pangandoy.”

Ang PADS Dragonboat team usa sa mihatag og garbo sa nasod sa ilang pagsungkit og duha ka gold medals sa 14th IDBF World Dragonboat Racing Championship niadtong Agosto, 2019.

Human sa ilang pagsulbong, gisugdan sa pagpalapad sa PADS ang ilang team sa pinaagi sa pag-umol og youth athletes nga maoy nakabenipisyo sa gihatag nga mga sapatos ni Tabal.

Dako ang pasalamat ni PADS executive director JP Maunes kang Tabal.

“Thank you so much Philippine Olympian and Cebu’s Marathon Queen Mary Joy Tabal for granting the wishes and making this all possible for our struggling young athletes. Anything is possible in sports! Dreams do come true,” batbat ni Maunes.

Dili kini ang unang higayon nga mihatag og mga sapatos si Tabal. Niadto pa tighatagan na siya og mga sapatos sa public school athletes dinhi sa Sugbo. Nagpasalamat pud si Tabal sa Navforcen sa Philippine Navy sa pag-abag niini sa programa.