GIANGKON sa Noah Declan Chess Team sa Bohol ang kampiyunato sa Cebu Executives and Professionals Chess Association (CEPCA) - organized 3rd Boy “Chessmoso” Pestaño Memorial Chess Cup Tatluhan Rapid Tournament nga nahuman niadtong Dominggo, Oktubre 20, 2019 sa Barracks Chess Club sa Robinsons Galleria.

Ang trayanggulo nila ni Norman Lonjas, Glicerio Pardillo Jr. ug Genesis Apog nakatigom og 16.0 puntos aron angkunon ang titulo ug ang P30,000 grand prize.

Nahiluna sa ikaduhang dapit mao tapok nila ni Fide master Anthony Makinano, Dr. Leo Lofranco ug Robert John Padel sa Triple Lima sa Catbalogan, Samar.

Ang AimCoop sa Aurora, nga gilangkuban nila ni Jaime Roumundo Edades, Wilhelm Joey Ardiente ug Cecil Cuevas, milangkat sa ikatulong luna aron kumpletuhon ang dominasyon sa bisitang mga puwersa.

Parehong nakatigom og 14.0 puntos ang Triple Lima ug AimCoop apan mingdaog bang Triple Lima sa tie-break aron ibulsa ang P20,000 nga ganti. Ang AimCoop nakakuha og P10,000 nga ganti.

Ang Bachelors nila ni Richard Natividad, Ruel Nuttal ug Martin Sean Kwan mao ang nakakuha og labing taas nga puwesto sa tanang teams gikan sa Sugbo.

Naangkon sa Bachelors ang ikaupat nga dapit nga adunay 13.0 puntos. Ang Sagay Chess Club Team A, nga aduna sab 13.0 puntos, maoy misakmit sa ikalimang dapit.

Si International Master Joel Pimentel sa Sagay Chess Club A maoy top player sa Board 1, si Glicerio Pardillo Jr sa Noah Declan Chess Team sa Board 2 ug Eduardo Tare II sa CDEO Veterans Move sa Board 3.

Ang torneyo, nga nakadani og 192 ka mga magduduwa gikan sa 64 ka teams, gipahinungod sa anhing Boy Pestaño, usa sa founding fathers sa Cepca ug kanhi chess columnist sa SunStar Cebu ug Superbalita Cebu.

Nagsuporta sa torneyo mao ang Handuraw Pizza, Celjem Construction, JBM Builders, Robinsons Galleria ug Salon de Rose. (ESL)