MOBALIK na sa boxing ring ang kanhi interim World Boxing Association (WBA) featherweight champion Jhack Tepora, duha ka mga tuig human sa makakugang niya nga kapildihan batok ni Mexican Oscar Escandon.

Ang gitawag og El Kapitan mosagubang sa iyang comeback fight batok sa beteranong si Ryan Maano sa eight-round welterweight fight sa Harada Boxing Gym-Suntok sa Pangarap VII karong Disyembre 17, 2021 sa Bohol.

Batok kang Escandon, si Tepora nasugamak sa 1st round knockout nga kapildihan niadtong Disyembre, 2019 sa Ontario, California nga maoy labing una niyang pilde.

Naghinamhinam na ang lumad nga taga Danao City, Cebu nga makabalik sa ring aron bangunon og balik ang iyang karera. Si Tepora adunay 23-1, 17 KOs nga rekord.

Si Maano adunay kartada nga 5-11, 2 KOs. Sa iyang uwahing tulo ka mga away, gipilde siya ni Tomjune Mangubat ug Carlo Bacaro ug midaog batok kang Elmer Naason.

Kon ang rekord maoy tan-awon, hayan puwerteng pagka-inilog ni Tepora niining awaya.

Kahinumdoman nga si Tepora mipalanog sa social media karong tuiga, dili kay aduna siya away, apan tungod sa iyang paghagit kang World Boxing Organization (WBO) International featherweight champion Mark “Magnifico” Magsayo pinaagi sa iyang vlog sa Youtube.

Gisaway si Tepora sa netizen tungod sa iyang pag-trashtalk ug paghagit kang Magsayo.

Hinuon, nahilot ra kini kay nagkaamigo man pagbalik ang duha ka mga Bisdak nga boksidor human nangayo og pasaylo si Tepora kang Magsayo pinaagi sa usa ka video call.

Gilauman nga mopakita og maayong away si Tepora sa iyang umaabot nga away nga gituohang makaabli og oportunidad kaniya alang sa mas dako nga away.

Sa kasamtangan, si Tepora nabansay na og sugod alang ning maong tahas ug determinado kining ibangon og balik ang iyang karera.