Dako ang purohan nga maangkon nila ni Brgy. Ginebra Gin Kings guard Scottie Thompson ug import Justin Brownlee ang individual awards sa Philippine Basketball Association (PBA) Commissioner’s Cup.

Pagkahuman sa semi-finals, si Thompson nahimutang sa ikaduhang luna alang sa inilugay sa Best Player of the Conference award pinaagi sa iyang 32.1 statistical points (SPs).

Ang nag-una mao si NorthPort Batang Pier forward Robert Bolick, kinsa adunay 33.9 SPs.

Apan wala nakaabot sa semi-finals ang Batang Pier samtang ang Gin Kings nakapatong sa finals.

Tungod niini, dako ang posibilidad nga maapsan ni Thompson si Bolick.

Sa iyang bahin, gipangulohan ni Brownlee ang inilugay sa Best Import award pinaagi sa iyang 52.70 SPs unya nagsunod kaniya sila si Nick Rakocevic sa Magnolia Hotshots (45.5 SPs) ug Devon Scott sa San Miguel Beermen (44.8 SPs).

Ang individual awards ipanghatag atol sa Game 4 sa best-of-seven finals series tali sa Gin Kings ug guest squad Bay Area Dragons.

Sa kasamtangan, ang Gin Kings nag-una sa finals series, 1-0, human nila gipanghubog ang Dragons sa Game 1, 96-81, niadtong adlaw sa Pasko sa Mall of Asia Arena.