Sa labing unang higayon gikan sa iyang pagbalik isip headcoach sa Talk N’ Text, nakapahigayon na og praktis si coach Chot Reyes sa Tropang Giga niadtong Miyerkules sa gabii, Mayo 19, 2021, sa Ilocos Centennial Arena.

Si Reyes, kinsa niadto lang Pebrero ning tuiga nakadesisyon nga mogiya pagbalik sa Tropang Giga, nag-post og 14-second video sa iyang Twitter account kabahin sa ilang labing unang praktis alang sa sunod season sa Philippine Basketball Association (PBA).

Nakatunol si Reyes og upat ka mga kampyunato sa Tropang Giga sa iyang paggunit sa team niadtong 2009 hangtod 2012 una kini mibiya aron magtutok sa iyang obligasyon isip head coach sa Gilas Pilipinas niadtong 2013.

“We practiced right away when we arrived,” asoy ni team manager Gabby Cui.

“We thank Gov. Matthew Manotoc and the Ilocos Norte LGU for hosting us here.”

Ang Tropang Giga maoy ikaduhang team sa PBA nga opisyal nang nakapahigayon og praktis pinaagi sa bubble set-up sunod sa Meralco Bolts. (ESL)