Mga duwa karon

4:00 pm- Terrafirma batok NorthPort

6:30 pm- San Miguel batok Meralco

Parehong mosuway pag-angkon og seguradong luna sa top 4 ang San Miguel Beermen ug Meralco Bolts sa ilang panagsangka sa main game karong alas 6:30 sa gabii sa Philippine Basketball Association (PBA) Governor’s Cup sa Smart Araneta Coliseum.

Ang Bolts kasamtangang nagpatong sa ikatulong puwesto dala ang 6-3 nga rekord samtang naa sa ikalima ang Beermen nga adunay 6-4 nga rekord.

Ang Bolts aduna pa’y duha ka nahabiling mga duwa sa elimination round samtang mao kini ang katapusang tahas alang sa Beermen paingon sa quarter-finals.

“Meron na kaming tsansa pumasok. Yung sa Top Four, we don’t know yet. But we’ll prepare hard for our last game as we prepare for the playoffs,” matod ni Beermen coach Leo Austria nga napatik sa www.pba.ph.

Sa premirong duwa, magsangka ang NorthPort Batang Pier ug Terrafirma Dyip karong alas 4:00 sa hapon.

Ang Batang Pier, nga nahimutang sa ikasiyam dala ang 4-5 nga rekord, nagkinahanglang modaog ning sangkaa aron makakumpayot og puwesto sa quarter-finals.

Sa ilang bahin, ang Dyip, nga adunay 2-7 nga rekord, wala na’y poruhan nga makaabante sa sunod round.