DILI na angay mabalaka ang Pilipinas ug ang ubang mga nasod kalabot sa pag-host sa Asia Oceania Olympic boxing qualifier human nga ang International Olympic Committee Boxing Task Force nakadesider nga dili na kini ipahigayon sa China aron paglikay sa makalilisang outbreak sa maong dapit nga mao ang Novel Coronavirus.

Usa ka adlaw human nga gikanselar ang maong event nga gikatakda unta sa Pebrero 3-14 sa Wuhan, China, ang BTF nga gipangulohan ni world gymnastics president Morinari Watanabe mihokom nga adto na kini himuon sa Marso 3-11 sa lain nga nasod.

“The boxing qualifying event has now been rescheduled, and is planned to take place between March 3 to 11. The BTF is currently exploring alternative locations outside the People’s Republic of China and will immediately inform the National Olympic Committees, National Federations and officials as soon as a new host is appointed,” matod ni Watanabe sa giluwatang pamahayag.

Ning maong kalambuan, ang Association of Boxing Alliances in the Philippines mopadayon sa ilang tinguha nga mosalmot sa bidding aron makuha ang katungod sa pag-host niini.

“That letter we sent previously was official. We will, however, write to follow up our request for guidelines for hosting,” matod ni ABAP secretary-general Ed Picson.

Ingon ni Picson nga dako og bintaha kon maka-host ang nasod sanglit makapataas kini sa moral sa mga atleta nga makahulbot og lingkuranan aron mo-qualify alang sa Tokyo Games sa bulan sa Hulyo.

Sa pagkakaron, ang nasod aduna pa duha ka atleta nga nakasiguro na og luna sa Tokyo Olympics. Kini sila si world champion gymnast Caloy Yulo ug pole-vaulter EJ Obiena. (JBM)