ANG panagsangka tali sa University of San Jose Recoletos (USJ-R) Jaguars ug Univesity of Southern Philippines Foundation (USPF) Panthers maoy moabli sa 2019 Minglanilla Mayor's Cup Inter-collegiate Christmas League karong Sabado, Disyembre 7, sa Minglanilla Sports Complex.

Kombinasyon sa mga beterano ug bag-ong rookie players, sagad niini gikan sa ilang high school teams, ang gipaabot nga iparada ni coach Leodie Garcia sa usa ka semanang kompetisyon.

"Sagad ani nila mga reserves gikan sa high school. Daghan man sab ang mawa nato sa sunod Cesafi season, so diri nato mahatagan og hashasan," matod ni Garcia.

Lakip sa mga rookies nga nalista ni Garcia mao si Kendrick Rieken Abarquez, ang most valuable player sa niaging Cebu Governor's Cup, Kevin Canaya Guibao, ang MVP sa 2019 Cesafi Partner's Cup. Anaa usab si Ryzel Guillan Gilbuena nga makig-ayuda sa 2019 slam dunk king Miguel Gastador, Elmer Delvo Echavez Jr. ug Renz Solomon.

Sama sa USJ-R, ang USPF, sa ilang bahin, langkuban usab og mga bag-o ug batan-ong recruits nga makig-ayuda sa ilang mga beterano.

"Duna mi bag-ong na-recruit pero tan-awonon pa sab kon makauyon ba ta," matod ni Brian Jereza, ang athletic chief sa USPF.

Ang Jaguars-Panthers encounter magsugod sa alas 8 sa gabii. Apan sa dili pa sugdan ang maong panag- engkuwentro, ang pre-season game sa 2020 Gullas Cup teams tali sa Talisay Aquastars ug Minglanilla Archangels maoy magsilbing preliminary game nga modayandayan sa tinuig nga kompetisyon nga sugdan sa alas 6:30 sa gabii.

Sa Dominggo, ang ikasangka sa Jaguars ang defending champions University of the Visayas (UV) Green Lancers.

Ang bag-ong Cesafi champions Southwestern University (SWU) Cobras ug ang University of Cebu (UC) Webmasters sa Lunes, Disyembre 9, maoy magsangka sa main game.

Magtakos usab ang UV Lancers ug ang USPF Panthers sa first game. (Superbalita Cebu)