KADAUGAN mao'y giabli sa University of Southern Philippines Foundation (USPF) Panthers human nila gibuntog ang University of San Jose Recoletos (USJ-R) Jaguars, 91-79, sa pagsugod sa 2019 Minglanilla Mayor's Cup Inter-collegiate Christmas League nga gipahigayon sa Minglanilla Sports Complex niadtong Sabado, Disyembre 7, 2019.

Ang import sa Panthers nga si Sameen Swint mitali og 27 puntos lakip na niini ang mga krusyal nga syat sa fourth quarter nga mao'y nag-wanang sa dalan paingon sa kadaugan.

Ang Jaguars ni coach Leodie Garcia nga miduwa nga wala'y import nakapakita og saktong labok sulod sa kapin tulo ka mga kuwarters apan ang ilang sunodsunod nga sipyat sa pasa sa naghinapos nga bahin maoy nakaparalisa sa ilang opensa.

Nabiyaan og singko puntos, 69-74, sa katapusang kuwatro minutos, ang Jaguars mipahagsa og rally ug ang tres ni Kendrick Abarquez maoy naghatag kanila og labaw, 74-72.

Apan kadto mao'y katapusang hunat sa USJ-R ug inabagan sa mga beteranong sila si Rodelio Cauba Jr. ug Aljie Mendez, ang USPF ni coach Brian James Jereza miselyo sa ilang unang daog.

Karong gabii, Disyembre 8, ikasangka sa USJ-R ang defending champion University of the Visayas (UV) Green Lancers sa ikaduhang adlaw sa kompetisyon.

Ning higayona, gipaabot nga ang Jaguars moparada sa ilang higanting import nga si Segamars Ewinike.

Sa preliminary game, gipildi sa Minglanilla Archangels ang Cong. Gullas Cup champion Talisay Aquastars sa tuneup match, 89-79.

Mga puntos:

USPF (91) - Swint 27, Chavez 16, Langahin 14, Mendez 9, Cuizon 7, Aguilar 5, Colina 4, Garong 4, Patalinhug 3.

USJ-R (79) - Echavez 16, Abarquez 13, Gilbuena 13, Tabio 13, Minoza 8, Rodriguez 8, Guibao 8, Pascua 3. (JBM)

Mga duwa sa Dominggo, December 8:

6:30 p.m. - Minglanilla versus Naga (Gullas Cup 20-under teams)

8:00 p.m. - USJ-R versus UV