GIPADAYAG ni mixed martial arts (MMA) superstar Fil-Am Brandon Vera ang iyang suporta ngadto sa ABS-CBN sa pagpanglimbasog sa television giant network alang sa franchise renewal.

Ang kasamtangang ONE heavyweight champion nag-post sa iyang hulagway sa Instagram diin iyang gibutang ang iyang kumo sa iyang dughan isip timailhan sa iyang pagsuporta sa Kapamilya network.

Aduna kini caption nga "Pasenysa I’m late I promise I’m here for this fight #LabanKaPamilya."

Si Vera usa lang sa taas nga listahan sa celebrities nga nagpabaha sa social media nga migamit sa signature colors sa ABS-CBN nga red, green ug blue isip pagpadayag sa ilang solidong suporta sa network.

Ubay-ubay na sab mga atleta ang ningpadayag sa ilang suporta sa Kapamilya network.

Dili ikalimod nga nakatabang og dako ang sports TV coverages sa ABS-CBN pinaagi sa ilang Sport+ Channel sa nagkadaiyang mga atleta.

Tungod sa mga kakulian nga ilang gisagubang kabahin sa ilang prankisa, ang ABS-CBN ning-unang sa ilang operasyon sugod niadtong Mayo 5.

Sa kasamtangan, padayon ang pagpanglimbasog sa ABS-CBN nga makakuha og bag-ong prankisa. (ESL)