GIPAHAMTANGAN og 10 ka mga duwa nga suspensyon sa Miami Heat ang usa sa ilang mga magduduwa nga si Dion Waiters human kini nasuta nga nagtumar og TCH, usa ka aktibong ingredient sa marijuana.

Si Waiters, kinsa nipirma og upat ka mga tuig nga kontrata sa Heat niadtong 2017 nga nagbalor og $52 million, nasakpan nga nagtumar og TCH atol sa biyahe sa team gikan sa Phoenix paingon sa Los Angeles niadtong Biyernes.

Ang National Basketball Association (NBA) drug policy nagdili sa team nga mohatag og komentaryo sa mga isyu nga sama niini apan ang Heat nagpagawas og opsiyal nga pamahayag kabahin sa ilang pagsuspenso kang Waiters.

“We are very disappointed in Dion’s actions this season that include the very scary situation on Thursday night, and grateful that the outcome wasn’t worse,” pamahayag sa Heat. “There have been a number of instances this season in which Dion has engaged in conduct detrimental to the team. Accordingly, he will be suspended without pay for 10 games.”

Gipasabot sa Heat nga mapasigarbuon sila sa gipakita sa ilang mga magduduwa ning kasamtangang season ug dili nila paundayunan ang mga mangil-ad nga binuhatan sama niini.

Nanghinaot ang Heat nga makat-on og leksyon si Waiters, kinsa nag-average og 13.2 puntos ug 2.8 assists sa iyang pagduwa sa Heat, Oklahoma City Thunder ug Cleveland Cavaliers.

Ang Heat kasamtangang naggunit og 6-3 nga rekord sa 2019-20 season. (AFP, ESL)