DI angay maguol ang mga dumadapig ug sumosunod ni legendary boxer Manny Pacquiao may labot sa nigawas nga balita may labot sa kahimtang sa iyang panglawas.

Si Pacqiao niangkon usa ka semana sa wala pa ang iyang impresibo nga kadaugan batok ni Lucas Mathhysse didto sa Kuala Lumpur, Malaysia nga adunay nakita nga “heart inborn problem” atol sa iyang routine medical ug physical check-up.

“I feel fine. I feel great. I thank God for giving me strength everyday and keeping me protected through all the years of my life. Winning by knockout over Matthysse was a bonus,” padayag ni Pacquiao kinsa mag-40 anyos na karong Disyembre.

Ang kadaugan sa labing bantugan nga boksidor sa kalibutan atol sa iyang panahon kinsa maoy bugtong atleta nga nahimong 8th division world champion maoy ika-60 sa iyang mabulokon nga karera ug ika-39 nga knockout. (PAC)