BISAN pa man og inilog ang ilang kontra apan alang kang Kawhi Leonard nga patas ang ilang pagpakigsangka batok sa defending champion Golden State Warriors sa 2019 National Basketball Association (NBA) Finals nga sugdan karong buntag didto sa korte sa Toronto Raptors - ang Scotiabank Arena.

“It’s just the same basketball game,” matod ni Leonard. “It’s 5-on-5. It’s still two hoops. So you just go out there and play hard and live with the results.”

Una pa man tuod kining pagtaak sa Raptors sa finals apan pipila sa ilang mga nag-unang players ang aduna nay igong kasinatian.

Si Leonard maoy na-MVP sa 2014 NBA Finals, sa dihang siya ug si Danny Green nakaangkon og titulo sa dihang didto pa sila sa San Antonio. Si Serge Ibaka aduna nay eksperiyensiya sa finals ubos sa Oklahoma City niadtong 2012, ug bisan sila si Kyle Lowry ug Marc Gasol ang nakakaduwa na usab sa Olympic finals.

Hinuon, kon eskperiyensiya sa finals ang hisgutan, ang Warriors dili na usab hibintahaan ug gani kini maoy ikalima nilang sunodsunod nga pagpatong sa championship series.

Apan ning higayona, lahi na ang rota nga ilang agian. Kon ang miaging upat nila ka destinasyon sa finals didto sa Cleveland Cavaliers, ning higayona adto na sa teritoryo sa Raptors, ang team nga nasulod sa NBA 24 ka tuig na ang nakalabay.

Una usab kining higayon nga ang NBA Finals duwaon gawas sa Estados Unidos, ug nagbuak sa upat ka nagkutay nga Warriors-Cavaliers season.

“Different for us obviously, having been in Cleveland four straight years, but this is more the rule. That was the exception,” matod ni Warriors coach Steve Kerr. “This is more what the finals normally feel like, where you’re going against a team you frankly don’t know that well and that you haven’t seen that often over the previous few years.”

Si Stephen Curry nakapuyo sa Toronto sa dihang ang iyang amahan nga si Dell didto pa sa Raptors ang katapusan niyang giduwaan sa NBA.

Apan bisan pa niini, lahi na usab ang pamati alang sa kinatibuk-ang puwersa sa Warriors, kinsa usa na karon sa mga NBA teams nga pinakadaghan og eksperiyensiya sa finals.

Nahitapo na sila sa Boston Celtics nga bugtong team sa NBA nga nakaabot sa finals ug lima ka sunodsunod nga seasons, 1957-66. Ning higayona mosuway na usab sila nga mamahimong unang team nga makasungkit og tulo ka sunodsunod nga titulo sukad niadtong 2000-02 diin ang Lakers maoy nakahimo sa ingon.

Gawas nga una kining higayon nga makasugat og lahi nga kontra sa finals, premiro usab kini alang kanila nga dili sila ang naghupot sa home court advantage.

Kompirmado na usab nga si Kevin Durant, bisan og nahikuyog sa team sa ilang pagsulong sa Toronto karong buntag, dili pa makaduwa. (JBM)