Nagbahin ang kanhi world champions nga sila si Melvin Jerusalem ug Marlon Tapales sa pasidungog isip “Boxers of the Year” sa 1st Pacquiao-Elorde Awards niadtong Dominggo sa gabii, Marso 24, 2024, sa Okada Manila.

Ang duha ka mga boksidor pulos nagmalampuson sa ilang kampanya sa niaging tuig hinungdan nga nakuha nila ang pasidungog sa kalihukan, nga maoy gipuli sa tinuig nga Gabriel “Flash” Elorde Memorial Boxing Awards and Banquet human nagtambayayong si Filipino boxing legend Manny “Pacman” Pacquiao ug ang Elorde Promotions.

Ubay-ubay nga mga boksidor ang gipasidunggan sab atol sa kalihukan tungod sa ilang nahimo sa tuig 2023.

Gawas sa mga boksidor, aduna sab ubang mga atleta nga gipasidunggan sama nila ni Tokyo Olympics gold medalist Hidilyn Diaz-Naranjo, pole vaulter EJ Obiena, pool legend Efren “Bata” Reyes, chess grandmaster Eugene Torre, ug world bowling champion Paeng Nepumoceno. / ESL