SULOD ning akong handurawan

Ikaw ug ako saya nga nag-uban

Ug kanunay kong hidamguhan

Nga naghalok kita makadaghan.

Nakit-an ko ikaw nga milabay

Sa dalan sa kilid sa among balay.

Inday, ako ba ang gipangita nimo?

Nakita ko ang mga pahiyom mo.

Nakita ko diha sa mga mata mo

Ang katahom nga gibathala ko.

Modupa ako sa imong atubangan

Ang kaanyag mo akong pagaludhan.

Nasayod ka unsay akong isulti

Ug nasayod ka unsay akong gibati.

Gilaraw kong kanimo isumbong

Gugma nga sa dughan nagdaghong.

Ganahan kong kanunay magsud-ong

Talagsaong gilaw sa imong katahom.

Ug kanunay ko nga isulti kanimo

Ang pagpangga ihatag ko kanimo,

Kay ang dughan ko daw buot mobuto

Sa pagbati kong kanunay nag-alburoto.

Inday, gusto kong masayran mo

Kon hain man ikaw karon --

Naglibog ko kon unsay buhaton

Kon ugaling ikaw magmasulub-on.

Sayri ako unsaon ko ikaw pag-angkon

Kay ang kahilom mo lisod sabton.

Apan sugdan ko lang sa pag-ingon

Gihigugma ko ang imong pahiyom.