INIGLIPANG sa gugma

Diha sa kasingkasing

Ang kaisipan mamulak

Usab og mga damgo

Nga nagataak

Sa daghang langit.

Ang gugma daw balsamo

Nga mohupay sa nagbangutang

Kalag ug andam mopasaylo

Ug motabon sa mga kasal-anan.

OH, GUGMA!

Isakay ako sa karwahe

Sa imong panahon,

Dad-a ako ngadto sa

Gidamgo kong himaya,

Kay sa akong pagbalik

Dad-on ko usab ang gidamgo

Kong langit dinhi sa yuta

Aron ang katawhan

May kalinaw ug pakigdait.

Pukawa king kalag

Sa bag-ong pakigbisog,

Isaliyab ang imong awit

Sa akong kahanginan,

Tugoting magpabilin ka

Sa akong panumduman

Aron di ko malimtan

Pagkablit ang matag kuldas

Sa gitara sa akong

Kasingkasing.

Ang gugma sama usab

Sa bughaw nga dagat

Nga puno sa hugahob.

Dili mapugngan ang iyang

Sulog ug mga balod

Nga bisan si Bathala

Modaplin ug pasagdan

Ang iyang Pagtaob.