DILI ang imong paa
Maoy akong gihapyod-hapyod
Kundili ang akong paa nga kunot na
Ug bukugon pa.
Kanindot unta kon ang imong paa
Maoy akong gihapyod-hapyod
Kay gawas nga kini puno sa bulok
Sa kaugmaon nga nagtangkil
Sa iyang kabatan-on daw anaa pa
Dinha ang kasidlak sa siga
Sa bituon nga kaniadto midan-ag
Sa linghod kong kalibutan.
Nahibawo kong ang imong paa
Dili gayud maako, ingon nga ang
Akong paa dili sab nimo maangkon
Kay duna na kitay lat-ang ug kal-ang
Sa atong pangedaron ug ang nagtabisay
Nga laway sa akong pagmahay
Kutob na lang sa panghayhay.
Apan timan-i nga ang kabigot karon
Sa imong paa pahimuslan lamang
Sa panahon ug ikaw limbungan
Sa imong kabatan-on nga inanay
Nang miirog padulong sa paa kong
Kunuton.