HINAY nga gitukas

Sa bidlisiw sa kabuntagon

Ang naghabol nga kangitngit

Sa kabukiran.

Ang langit usab duol

Sa kinatumyan diin hinay

Nga migimaw ang adlaw

Nahimong puwa

Hangtod sa pagkatin-aw.

Ako nga nagsud-ong

Sa pagpukan sa kahayag

Sa kangitngit nahinuklog:

Sayon mataligam-an

Ang talan-awon nga naandan na

Ug makalimtan nga ang samang

Mga esena nagmatuod

Sa presensiya sa Usa ka gahom

Nga ang hunahuna sa tawo

Wa pa makatugkad.