LEONEL QUILLO

San Fernando, Cebu

KINTAHAY ikaw ang uniberso kansang kalapdon

nagpuyo ang usa ka mansyon sa langit.

Kansang pultahan mao ang gabon sa kabuntagon

nga maoy mosugat sa mga buwak gikan

sa ilang pagkatulog.

Kintahay ikaw ang kalibutan nga akong balay

nga giampingan, ang gitipigang hulagway

sulod sa pitaka, ang karaang biste nga tuyo

kong di labhan, ang karaang tiket sa bus

nga nagusbat sulod sa bulsa sa akong maong,

ang katam-is sa sorbete, ang payong ubos sa altar,

ang kahapunong kuyog ang bidlisiw sa pagsawop

samtang galingkod sa lingkuranang duha ray masigo,

ang panumdoman nga nindot gayud nga tambayan,

ug miabot sa way pananghid ang kagabhion

kuyog nga mitukar ang sonata dungan

sa akong pagtudlo sa mga bituong buot kong

sangkuon ang gitas-on.

Kintahay ikaw ang bulawan sa kalangitan,

makab-ot ko ba kaha ikaw o magpabiling

tim-os kong handurawan?