MAY nakita ang hubo kong mga mata

Mga abog nangapulpog sa ngilit

Ning handurawan.

Kaingon ko bag damgo lamang

Apan diay mga singot ug luhang

Midaligdig sa aping kong hugaw

Paingon sa baba kong nagtukaw

Sa pagsigeg kaon og bahaw.

Mao ba diay kini ang esena

Sa kinabuhi, may telon ug bantawan

Nga giandam na daan sa kapalaran?

Sa akong handurawan nakita ko

Ang mga abog nga nangapulpog.

May nanulod sa bulsa kong nagkulob.

Ako nangandoy nga unta sila manglayas

Gikan sa pitaka kong way sulod.

Ah, sila natibuok ra

Kay napiksan sa singot sa ulan.

Kay sila mga abog man

Moipon gihapon sila sa yuta.