APRONIANITO F. MIRAMON

Talisay, Santander, Cebu

Nakigduylo ang akong mga mata

Sa makapagbang bahakhak

Nga nanuasik gikan sa baba

Sa nanulisok nga adlaw

Tinubdan sa gahom sa serepente.

Ang akong panit taming sa pag-antos

Sa mga pahit sa mga leopardong pak-an.

Pugos kong gianinaw kon napintal ba

Ni Van Gogh ang akong dagway

Didto sa gay-ot nga kalangitan.

Mipusgay sa nangalisbong kahaw-ang

Ang kurog sa hinuyad nga mga kimumo

Nga naghakgom sa pudyot nga hulmigas.

Nagkapaas nga siyagit sa pakigbisog

Mitalipsay sa bungol nga tore.